Madridning «Real» klubi yarim himoyachisi Federiko Valverde «Atletiko»ga qarshi bahsda to‘g‘ridan-to‘g‘ri qizil kartochka oldi.
Urugvaylik futbolchi yakshanba kungi derbining 77-daqiqasida Aleks Baenaga nisbatan qo‘pollik ishlatgani uchun maydondan chetlatildi. Cope nashri tarqatgan ma’lumotlarga ko‘ra, 27 yoshli futbolchi La Liganing ikkita o‘yiniga diskvalifikasiya qilinadi. Yarim himoyachi jamoasiga 4 va 10 aprel kunlari mos ravishda «Malyorka» hamda «Jirona»ga qarshi kechadigan bahslarda yordam bera olmaydi. Ushbu o‘yinlar oralig‘ida (7 aprel kuni) «qaymoqranglilar» Chempionlar Ligasi doirasida «Bavariya»ga qarshi maydonga tushishadi.
«Real» «Atletiko»ni 3:2 hisobida mag‘lub etdi. Federiko Valverde 55-daqiqada «matraschilar» darvozasini ishg‘ol qilgan edi.
