Londonning «Arsenal» klubi yarim himoyachisi Deklan Rays «kanonirlar»ning Angliya liga kubogi finalida «Manchester Siti»dan uchragan mag‘lubiyatiga izoh berdi. O‘yin 2:0 hisobida «shaharliklar» foydasiga hal bo‘ldi. Shunga qaramay, Rays ushbu mag‘lubiyat jamoani g‘alabalarga yanada chanqoq qilishini ta’kidladi.
«Finaldagi mag‘lubiyat bizni to‘xtatib qolmaydi. Bu faqat rivojlanishda davom etishimiz va mavsumni yanada kuchliroq yakunlashimiz uchun ishtiyoqimizni oshiradi, xolos», — deya Deklan Raysning so‘zlaridan iqtibos keltirmoqda jurnalist Fabrisio Romano o‘z ijtimoiy tarmoqlarida.
Qayd etish joizki, ushbu mag‘lubiyatdan so‘ng «kanonirlar» joriy mavsum yakunida «kvadrupl» qayd etish (to‘rtta sovrinni qo‘lga kiritish) imkoniyatidan mahrum bo‘lishdi.
