Italiyaning «Milan» klubi sobiq yarim himoyachisi Demetrio Albertini Luka Modrichning ko‘rsatayotgan o‘yinlaridan aslo hayratda emasligini ma’lum qildi. Xorvatiyalik futbolchi o‘tgan yilning yozida «Milan»ga ko‘chib o‘tgan edi va tez orada butun Italiya chempionati uchun ajoyib xarid ekanligini isbotladi.
«Men Luka Modrichning o‘yin sifatidan mutlaqo hayratda emasman. Italiya chempionatida sur’at boshqa kuchli ligalarga qaraganda pastroq, shu ma’noda unga moslashish ancha oson. Biroq Modrichning bunchalik barqaror o‘yin ko‘rsatishini va maydonda shunchalik ko‘p vaqt o‘tkazishini kutmagandim», — deya Albertinining so‘zlarini keltiradi pianetamilan.it.
Eslatib o‘tamiz, Demetrio Albertinining o‘zi 1988 yildan 2002 yilgacha «Milan» sharafini himoya qilgan.
