Londonning «Tottenxem» klubi bosh murabbiyi Igor Tudor yaqin ikki kun ichida jamoani tark etadi. Bu haqda taniqli jurnalist Pit O’Rurk xabar bermoqda.

Manbaning ma’lum qilishicha, 47 yoshli xorvatiyalik mutaxassis yaqin 24-48 soat ichida «Tottenxem»dan ketadi. Uning o‘rnini egallash uchun asosiy nomzod sifatida «Marsel»ning sobiq ustozi Roberto De Dzerbi ko‘rilmoqda. «Tottenxem» rahbariyati 46 yoshli italiyalik mutaxassisni jamoani mavsum yakunida emas, balki hoziroq qabul qilib olishga ko‘ndirishdan umid qilmoqda.

Tudor 14 fevral kuni Tomas Frank o‘rniga «Tottenxem» boshqaruvini qo‘lga olgan edi. Xorvatiyalik murabbiy qo‘l ostida «shporlar» barcha musobaqalarda yettita o‘yin o‘tkazib, bor-yo‘g‘i bitta g‘alabaga erishdi. Jamoa bir bor durang o‘ynagan bo‘lsa, besh marotaba mag‘lubiyat alamini tatib ko‘rdi.

Premyer-liganing 31-turida «Tottenxem» o‘z uyida «Nottingem Forest»ga yirik hisobda (0:3) imkoniyatni boy berib, xavfli hududga (quyi ligaga tushib ketish zonasiga) yaqinlashib qoldi.