Лондоннинг «Тоттенхэм» клуби бош мураббийи Игор Тудор яқин икки кун ичида жамоани тарк этади. Бу ҳақда таниқли журналист Пит О’Рурк хабар бермоқда.

Манбанинг маълум қилишича, 47 ёшли хорватиялик мутахассис яқин 24-48 соат ичида «Тоттенхэм»дан кетади. Унинг ўрнини эгаллаш учун асосий номзод сифатида «Марсель»нинг собиқ устози Роберто Де Дзерби кўрилмоқда. «Тоттенхэм» раҳбарияти 46 ёшли италиялик мутахассисни жамоани мавсум якунида эмас, балки ҳозироқ қабул қилиб олишга кўндиришдан умид қилмоқда.

Тудор 14 февраль куни Томас Франк ўрнига «Тоттенхэм» бошқарувини қўлга олган эди. Хорватиялик мураббий қўл остида «шпорлар» барча мусобақаларда еттита ўйин ўтказиб, бор-йўғи битта ғалабага эришди. Жамоа бир бор дуранг ўйнаган бўлса, беш маротаба мағлубият аламини татиб кўрди.

Премьер-лиганинг 31-турида «Тоттенхэм» ўз уйида «Ноттингем Форест»га йирик ҳисобда (0:3) имкониятни бой бериб, хавфли ҳудудга (қуйи лигага тушиб кетиш зонасига) яқинлашиб қолди.