Madridning «Atletiko» klubi vingeri Juliano Simeone o‘zini Argentina terma jamoasining asosiy tarkib futbolchisi deb hisoblamasligini tan oldi.

«Men o‘zimni asosiy tarkib o‘yinchisi deb hisoblamayman. Faqat barmoq bilan sanarli futbolchilargina bunga haqiqatan da’vogarlik qilishlari mumkin. Yevropada ham, Argentinada ham har kuni terma jamoadan chaqiruv olish uchun tinimsiz mehnat qilayotgan futbolchilar juda ko‘p. Yaxshi o‘yin ko‘rsatishda davom etish kerak, chunki daraja ozgina pasaysa ham, terma jamoadan chetda qolish mumkin», — deya Simeonening so‘zlarini keltirmoqda The Touchline.

Ushbu mavsumda 23 yoshli Simeone barcha musobaqalarda jami 43 ta o‘yinda ishtirok etib, 6 ta gol urdi va 8 ta golli uzatmani amalga oshirdi.

Argentina terma jamoasi safida vinger 9 ta o‘yin o‘tkazib, bitta gol muallifiga aylangan.