«Real» tibbiyot xodimlarining hujumchi Kilian Mbappening tizzasini tekshirishda yo‘l qo‘ygan xatosi bunday holatlardagi yagona holat emas. Bu haqda L'Équipe nashri xabar berdi.

Manba ma’lumotiga ko‘ra, shifokorlar Eduardu Kamavinganing chap to‘pig‘idan olgan jarohatida ham xatoga yo‘l qo‘ygan bo‘lishi mumkin. Xabarda aytilishicha, 3 dekabr kuni Bilbaoda olingan jarohatdan so‘ng futbolchiga noto‘g‘ri oyoqqa MRT tekshiruvi o‘tkazilgan. Natijada fransuz futbolchisi bir necha haftaga safdan chiqqan.

Avvalroq OAVda «Real» shifokorlari Kilian Mbappening jarohatini baholashda ham xatoga yo‘l qo‘yib, noto‘g‘ri tizzani tekshirgani haqida xabarlar tarqalgan edi. Bu ma’lumot Ispaniyada tasdiqlangani aytilgan, biroq futbolchining o‘zi Braziliyaga qarshi o‘yin oldidan o‘tkazilgan matbuot anjumanida bu gaplarni qat’iy rad etdi. Mbappe bunday xabarlar qayerdan chiqayotganini tushunmasligini aytdi va uning sog‘ligi to‘liq nazoratda ekanini ta’kidladi.