«Реал» тиббиёт ходимларининг ҳужумчи Килиан Мбаппенинг тиззасини текширишда йўл қўйган хатоси бундай ҳолатлардаги ягона ҳолат эмас. Бу ҳақда L'Équipe нашри хабар берди.

Манба маълумотига кўра, шифокорлар Эдуарду Камавинганинг чап тўпиғидан олган жароҳатида ҳам хатога йўл қўйган бўлиши мумкин. Хабарда айтилишича, 3 декабрь куни Бильбаода олинган жароҳатдан сўнг футболчига нотўғри оёққа МРТ текшируви ўтказилган. Натижада француз футболчиси бир неча ҳафтага сафдан чиққан.

Аввалроқ ОАВда «Реал» шифокорлари Килиан Мбаппенинг жароҳатини баҳолашда ҳам хатога йўл қўйиб, нотўғри тиззани текширгани ҳақида хабарлар тарқалган эди. Бу маълумот Испанияда тасдиқлангани айтилган, бироқ футболчининг ўзи Бразилияга қарши ўйин олдидан ўтказилган матбуот анжуманида бу гапларни қатъий рад этди. Мбаппе бундай хабарлар қаердан чиқаётганини тушунмаслигини айтди ва унинг соғлиги тўлиқ назоратда эканини таъкидлади.