«Atletiko» yarim himoyachisi Markos Lyorente hujumchi Xulian Alvaresning joriy mavsum yakunida Madrid klubini tark etishi mumkinligi haqidagi mish-mishlarga munosabat bildirdi.

«Xulian Alvares «Atletiko»da baxtli. Uning motivasiyasi yuqori. Gol urgan vaqtida uning muvaffaqiyatga erishishni qanchalik xohlayotgani ko‘rinib turadi. U bor e’tiborini o‘yinga qaratgan, OAVda paydo bo‘layotgan barcha gap-so‘zlar esa shunchaki tashqi shov-qin, xolos. Bu narsalar jamoaga ta’sir qiladi deb o‘ylamayman», — deya Lyorentening so‘zlarini keltiradi Diario SPORT nashri.

Joriy mavsumda Xulian Alvares «matraschilar» safida barcha turnirlarda 44 ta o‘yinda maydonga tushib, 17 ta gol urdi va 9 ta golli uzatmani amalga oshirdi. Uning «Atletiko» bilan shartnomasi 2030 yilning 30 iyuniga qadar mo‘ljallangan.