Shveysariya va Germaniya terma jamoalari o‘rtasida o‘rtoqlik uchrashuvi bo‘lib o‘tdi. Bazel shahridagi «Sankt-YAkob Park» stadionida o‘tgan bahsni angliyalik hakam Kris Kavana boshqardi. Uchrashuv mehmonlarning 4:3 hisobidagi g‘alabasi bilan yakunlandi.

Uchrashuvda hisobni 17-daqiqada mezbonlar hujumchisi Dan Ndoy ochdi. 26-daqiqada Germaniya himoyachisi Jonatan Ta hisobni tenglashtirdi. 41-daqiqada Bril Embolo Shveysariyani yana oldinga olib chiqdi, ammo birinchi bo‘limga qo‘shib berilgan vaqtda Serj Gnabri javob golini kiritdi.

61-daqiqada Florian Virs Germaniyani oldinga olib chiqdi, 79-daqiqada esa Joel Monteyru hisobni yana tenglashtirdi. Oradan olti daqiqa o‘tib, Virs dubl rasmiylashtirib, jamoasiga 4:3 hisobidagi g‘alabani taqdim etdi.

Har ikki jamoa ham 2026 yil yozida AQSH, Kanada va Meksikada bo‘lib o‘tadigan jahon chempionatida ishtirok etadi. Saralash bosqichi yakunlariga ko‘ra, Germaniya A guruhida 15 ochko bilan birinchi o‘rinni egallagan bo‘lsa, Shveysariya V guruhida 14 ochko bilan peshqadam bo‘lgan.

O‘rtoqlik uchrashuvi.
27 mart 2026 yil, juma.
Shveysariya — Germaniya - 3:4
Gollar: 1:0 — Ndoy (17), 1:1 — Ta (26), 2:1 — Embolo (41), 2:2 — Gnabri (45+2), 2:3 — Virs (61), 3:3 — Monteyru (79), 3:4 — Virs (85)