Швейцария ва Германия терма жамоалари ўртасида ўртоқлик учрашуви бўлиб ўтди. Базель шаҳридаги «Санкт-Якоб Парк» стадионида ўтган баҳсни англиялик ҳакам Крис Кавана бошқарди. Учрашув меҳмонларнинг 4:3 ҳисобидаги ғалабаси билан якунланди.

Учрашувда ҳисобни 17-дақиқада мезбонлар ҳужумчиси Дан Ндой очди. 26-дақиқада Германия ҳимоячиси Жонатан Та ҳисобни тенглаштирди. 41-дақиқада Брил Эмболо Швейцарияни яна олдинга олиб чиқди, аммо биринчи бўлимга қўшиб берилган вақтда Серж Гнабри жавоб голини киритди.

61-дақиқада Флориан Вирц Германияни олдинга олиб чиқди, 79-дақиқада эса Жоэль Монтейру ҳисобни яна тенглаштирди. Орадан олти дақиқа ўтиб, Вирц дубль расмийлаштириб, жамоасига 4:3 ҳисобидаги ғалабани тақдим этди.

Ҳар икки жамоа ҳам 2026 йил ёзида АҚШ, Канада ва Мексикада бўлиб ўтадиган жаҳон чемпионатида иштирок этади. Саралаш босқичи якунларига кўра, Германия А гуруҳида 15 очко билан биринчи ўринни эгаллаган бўлса, Швейцария В гуруҳида 14 очко билан пешқадам бўлган.

Ўртоқлик учрашуви.
27 март 2026 йил, жума.
Швейцария — Германия - 3:4
Голлар: 1:0 — Ндой (17), 1:1 — Та (26), 2:1 — Эмболо (41), 2:2 — Гнабри (45+2), 2:3 — Вирц (61), 3:3 — Монтейру (79), 3:4 — Вирц (85)