«Napoli» yarim himoyachisi Skott Maktominay faoliyatini Saudiya Arabistonida davom ettirishi mumkin edi.

Insayder Nikolo Skiraning ma’lumotlariga ko‘ra, Saudiya klubi shotlandiyalik futbolchini o‘tishga ko‘ndirish uchun juda katta maosh taklif qilgan, biroq 29 yoshli futbolchi bu taklifni rad etgan. Yarim himoyachi «Napoli»da qolishni istaydi. U allaqachon shartnomani 2030 yilgacha (yana bir mavsumga uzaytirish imkoniyati bilan) yangilash bo‘yicha muzokaralar olib bormoqda. Neapol klubi xavbekning maoshini oshirishni rejalashtirgan.

Skott Maktominay 2024 yilda 30 million yevro evaziga «Manchester Yunayted»dan «Napoli»ga o‘tgan edi. Uning amaldagi shartnomasi 2028 yil 30 iyungacha mo‘ljallangan. Joriy mavsumda yarim himoyachi Neapol klubi safida 36 ta o‘yinda maydonga tushib, 11 ta gol urdi va to‘rtta golli uzatmani amalga oshirdi.