«Bavariya» boshqaruvi a’zosi Uli Xyoness Myunxen klubi bosh murabbiyligi lavozimiga Vensan Kompanini tayinlash tavakkalchilik bo‘lganmi yoki yo‘qligi haqida so‘zlab berdi.
«Kompani bilan shartnoma imzolashdan oldin Pep Gvardiolaga qo‘ng‘iroq qilib, uning fikrini so‘raganimizda, u Vensanni hech qanday ikkilanishlarsiz olishimiz mumkinligini aytdi. Avvaliga biz bunga shubha bilan qaragandik; u biz muzokara olib borgan to‘rtinchi yoki beshinchi nomzod edi. Men Yulian Nagelsmann, Ralf Rangnik, Tomas Tuxel, shuningdek, agar «Kristal Pelas» qo‘yib yuborganida kelishi mumkin bo‘lgan Oliver Glasnerni nazarda tutyapman.
Kompanini tayinlash Maks Eberlning g‘oyasi edi. Ilk uchrashuv «Kefers» restoranida Gerbert Xayner, Maks, Kristof Froynd, Kompani va uning otasi — Belgiyaning sobiq meri ishtirokida bo‘lib o‘tdi. Yarim soatdan keyin men Kompani nomzodini ma’qulladim. U bizga kerak bo‘lgan murabbiy ekanligini tushundim», — dedi Xyoness Kicker nashriga bergan intervyusida.
Vensan Kompani 2024 yilning yozida «Bavariya» boshqaruvini qo‘lga oldi. Uning qo‘l ostida Myunxen klubi o‘tgan mavsumda Bundesliga va Germaniya Superkubogida g‘olib chiqdi.
