«Бавария» бошқаруви аъзоси Ули Хёнесс Мюнхен клуби бош мураббийлиги лавозимига Венсан Компанини тайинлаш таваккалчилик бўлганми ёки йўқлиги ҳақида сўзлаб берди.
«Компани билан шартнома имзолашдан олдин Пеп Гвардиолага қўнғироқ қилиб, унинг фикрини сўраганимизда, у Венсанни ҳеч қандай иккиланишларсиз олишимиз мумкинлигини айтди. Аввалига биз бунга шубҳа билан қарагандик; у биз музокара олиб борган тўртинчи ёки бешинчи номзод эди. Мен Юлиан Нагельсманн, Ральф Рангник, Томас Тухель, шунингдек, агар «Кристал Пэлас» қўйиб юборганида келиши мумкин бўлган Оливер Гласнерни назарда тутяпман.
Компанини тайинлаш Макс Эберлнинг ғояси эди. Илк учрашув «Кеферс» ресторанида Герберт Хайнер, Макс, Кристоф Фройнд, Компани ва унинг отаси — Бельгиянинг собиқ мэри иштирокида бўлиб ўтди. Ярим соатдан кейин мен Компани номзодини маъқулладим. У бизга керак бўлган мураббий эканлигини тушундим», — деди Хёнесс Kicker нашрига берган интервьюсида.
Венсан Компани 2024 йилнинг ёзида «Бавария» бошқарувини қўлга олди. Унинг қўл остида Мюнхен клуби ўтган мавсумда Бундеслига ва Германия Суперкубогида ғолиб чиқди.
