Eron Sport vazirligi mamlakat terma jamoalari va klublariga “dushman” deb hisoblangan davlatlarga safar qilishni noma’lum muddatga taqiqladi. Bu haqda IRNA agentligi xabar bermoqda.

“Milliy terma jamoalar va klublarning dushman deb hisoblanuvchi hamda sportchilar xavfsizligini ta’minlay olmaydigan mamlakatlarga borishi keyingi bildirishnomaga qadar taqiqlanadi”, deyiladi vazirlik bayonotida.

Ushbu qaror Osiyo Chempionlar Ligasi doirasida Saudiya Arabistoni hududida o‘tishi kerak bo‘lgan Eronning “Traktor” hamda BAAning “Shabab Al-Ahli” jamoalari o‘rtasidagi o‘yin arafasida qabul qilindi. Vazirlik hozircha “dushman davlatlar” ro‘yxatini rasman e’lon qilmagan bo‘lsa-da, mamlakatda xavfsizlik choralari kuchaytirilgan va Eron havo hududi hamon yopiqligicha qolmoqda.

Avvalroq Eron futbol federasiyasi JCH—2026 guruh bosqichi o‘yinlarini AQSHdan Meksikaga ko‘chirish bo‘yicha FIFA bilan muzokaralar olib borayotgani haqida xabarlar tarqalgan edi.

Eslatib o‘tamiz, AQSH va Isroil bilan davom etayotgan mojaro fonida Eron BAA, Saudiya Arabistoni va Fors ko‘rfazidagi boshqa mamlakatlar hududidagi bazalarga hujum qilgan edi. Tehron ushbu bazalardan AQSH tomoni Eronga zarba berishda foydalanayotganini da’vo qilmoqda.