«Barselona» darvozaboni Joan Garsiya Ispaniya terma jamoasi safidagi debyutidan so‘ng intervyu berdi.

24 yoshli futbolchi «qizil furiya» libosidagi ilk o‘yinini o‘tkazdi — u Misrga qarshi kechgan o‘rtoqlik uchrashuvining (0:0) ikkinchi bo‘limida David Rayyani almashtirdi. Bundan avvalgi Serbiyaga qarshi bahsda (3:0) ispaniyaliklar darvozasini Unay Simon qo‘riqlagan edi.

«Simon va terma jamoaning boshqa barcha darvozabonlari bilan munosabatlarim a’lo darajada. Agar meni Jahon chempionatiga chaqirishsa, bundan juda xursand bo‘laman, lekin hozir yana bor e’tiborimni "Barselona"ga qaratishim lozim», — dedi Joan Garsiya o‘z intervyusida.

Eslatib o‘tamiz, avvalroq Ispaniya terma jamoasi bosh murabbiyi Luis de la Fuente Unay Simonni o‘z jamoasining «birinchi raqamli» darvozaboni deb hisoblashini ochiq tan olgan edi.