Argentina terma jamoasi hujumchisi Lionel Messi penalti tepish huquqini jamoadoshi Nikolas Otamendiga topshirdi.
Zambiyaga qarshi kechgan o‘rtoqlik uchrashuvining ikkinchi bo‘limi boshida argentinaliklar 11 metrlik jarima to‘pini qo‘lga kiritishdi. «Inter Mayami» forvardi dubl qayd etishi mumkin edi, biroq u nuqtaga Otamendi yaqinlashishini istadi. «Benfika» himoyachisi ishonchni oqladi va hisobni 3:0 ko‘rinishiga keltirdi, shundan ko‘p o‘tmay u zaxiraga olindi. Katta ehtimol bilan, 38 yoshli futbolchi uchun bu o‘z vatanidagi muxlislar qarshisida milliy terma jamoa libosidagi so‘nggi o‘yin bo‘ldi.
Uchrashuv 5:0 hisobidagi g‘alaba bilan yakunlandi. Shuningdek, Xulian Alvares va Valentin Barko o‘z hisobiga bittadan gol yozdirib qo‘yishdi, yana bir vaziyatda esa raqib avtogol muallifiga aylandi.
