"Liverpul" bosh murabbiyi Arne Slot matbuot anjumanida ishtirok etdi. Niderlandiyalik mutaxassisning so‘zlariga ko‘ra, asosiy darvozabon Alisson yaqin oradagi o‘yinlarda jamoaga yordam bera olmaydi. Braziliyalik posbon kutilganidan ko‘proq vaqtni o‘tkazib yuboradigan ko‘rinadi.
"Alisson ertaga o‘ynamaydi va "PSJ"ga qarshi navbatdagi bahsda ham ishtirok etmaydi. U uzoqroq muddatga safdan chiqdi. Biz uning mavsum yakuniga yaqin formaga kirishini kutyapmiz", — dedi Slot.
Terma jamoalar tanaffusidan oldin Alisson Premyer-liga doirasidagi "Brayton"ga qarshi o‘yinni ham o‘tkazib yuborgan edi. Eslatib o‘tamiz, shanba kuni, 4 aprel kuni "Liverpul" Angliya Kubogi 1/4 finalida "Manchester Siti" bilan kuch sinashadi.
