Londonning «Chelsi» klubi yarim himoyachisi Enso Fernandes Madridning «Real» klubiga o‘tishi mumkin. Bu haqda Diario SPORT nashri xabar bermoqda.

Manbaning ma’lumotlariga ko‘ra, «Chelsi» argentinalik futbolchi borasidagi o‘z pozisiyasini o‘zgartirgan va endilikda «Real» bilan muzokaralar olib borishga tayyor. Ta’kidlanishicha, «ko‘klar» yarim himoyachini 100 million yevroga yaqin summaga sotib yuborishlari mumkin.

Eslatib o‘tamiz, avvalroq Fernandes Madridga ko‘chib o‘tishni istashi haqida bayonot bergan edi. Ushbu so‘zlari tufayli «Chelsi» rahbariyati futbolchini ikkita o‘yinga chetlatish haqida qaror qabul qilgandi.

Joriy mavsumda 25 yoshli xavbek barcha turnirlarda 46 ta uchrashuvda maydonga tushib, 12 ta gol urdi va 6 ta golli uzatmani amalga oshirdi. Futbolchining klub bilan shartnomasi 2032 yilgacha mo‘ljallangan.