«Barselona» Madridning «Atletiko» klubiga qarshi kechgan bahsda ikki nafar futbolchisini yo‘qotdi. Uchrashuvning 40-daqiqasida jamoa ustozi Xans-Diter Flik Ronald Arauxoni majburan almashtirib, uning o‘rniga Mark Bernalni maydonga tushirgan bo‘lsa, 62-daqiqada 18 yoshli ispaniyalik futbolchining o‘zi ham maydonni tark etishga majbur bo‘ldi — uning o‘rnini Jyul Kunde egalladi.
«Arauxo jarohat tufayli maydonni tark etishiga to‘g‘ri keldi. Bernal esa o‘yinni davom ettirishga harakat qilib ko‘rishini aytdi, biroq uning to‘pig‘ida muammolar bor edi. Baxtimizga, har ikki jarohat ham u qadar jiddiy emasdek ko‘rinmoqda. Kuzatamiz», — deya Flikning so‘zlarini keltirmoqda Managing Barca.
«Barselona» bir kishi ko‘p bo‘lib o‘ynab, «matraschilar» ustidan 2:1 hisobida g‘alabani ilib ketdi. Chorshanba kuni jamoalar Chempionlar Ligasi chorak finali doirasida endi «Kamp Nou»da to‘qnash kelishadi.
