«Барселона» Мадриднинг «Атлетико» клубига қарши кечган баҳсда икки нафар футболчисини йўқотди. Учрашувнинг 40-дақиқасида жамоа устози Ханс-Дитер Флик Рональд Араухони мажбуран алмаштириб, унинг ўрнига Марк Бернални майдонга туширган бўлса, 62-дақиқада 18 ёшли испаниялик футболчининг ўзи ҳам майдонни тарк этишга мажбур бўлди — унинг ўрнини Жюль Кунде эгаллади.
«Араухо жароҳат туфайли майдонни тарк этишига тўғри келди. Берналь эса ўйинни давом эттиришга ҳаракат қилиб кўришини айтди, бироқ унинг тўпиғида муаммолар бор эди. Бахтимизга, ҳар икки жароҳат ҳам у қадар жиддий эмасдек кўринмоқда. Кузатамиз», — дея Фликнинг сўзларини келтирмоқда Managing Barca.
«Барселона» бир киши кўп бўлиб ўйнаб, «матрасчилар» устидан 2:1 ҳисобида ғалабани илиб кетди. Чоршанба куни жамоалар Чемпионлар Лигаси чорак финали доирасида энди «Камп Ноу»да тўқнаш келишади.
