O‘zbekistonlik himoyachi Ildar Mamatkazin «Okjetpes»ning yangi a’zosi — yarim himoyachi Bektemir Abdumannonovning o‘yin sifatlari haqida fikr bildirdi. Ular avval bir jamoada to‘p surishgan.

— Abdumannonovning o‘yin sifatlarini qanday baholaysiz?
— Bektemir texnik jihatdan kuchli futbolchi. Uning driblingi ajoyib, tezligi ham yomon emas, qaror qabul qilish qobiliyati yaxshi. Maydonni yaxshi ko‘radi, sheriklarini his qiladi, standart vaziyatlarda xavfli. O‘ylaymanki, uning statistikasi «Andijon»dagi ahamiyatini to‘liq ko‘rsatib beradi. So‘nggi ikki mavsumda ancha o‘sdi, demak, yana rivojlanish salohiyati bor.

— Nima uchun u «Dinamo»ga mos tushmadi?
— Ko‘rinishidan, Vadim Abramov futbolchilardan universallik va himoyada ishlashni talab qiladi. Bu esa Bektemirning aynan zaif tomoni. U doim ham himoyaga qaytishga ulgurmaydi va ochig‘i, buni unchalik xush ko‘rmaydi. Uning stixiyasi — hujum.

— «Okjetpes» uchun bu yaxshi transfer deb o‘ylaysizmi?
— Nega endi yo‘q? Agar jamoa hujumkor futbol o‘ynasa, himoyasi ishonchli bo‘lsa va murabbiy unga erkinlik bersa, Bektemir yangi klubda o‘zini ko‘rsata oladi.

23 yoshli vinger bugun rasman "Okjetpes"ga yarim mavsumlik ijara asosida o‘tdi. Samarqand klubi matbuot xizmati ma’lumotiga ko‘ra, "Dinamo" futbolchini yozgi transfer oynasida qaytarib olish huquqini saqlab qolgan.

O‘zbekiston chempionatida Bektemir Abdumannonov 93 ta o‘yinda ishtirok etib, 14 ta gol urgan va 19 ta golli uzatma bergan. U "Andijon" safida 2024 yilgi O‘zbekiston Kubogi sohibi bo‘lgan.