«Barselona»ning sobiq futbolchisi, mashhur tennischi Rafael Nadalning amakisi Migel Anxel Nadal «Real»ning joriy mavsumdagi muvaffaqiyatsizliklari haqida o‘z fikrini bildirdi. Madridliklar La Liganing 30-turida «Malyorka»ga imkoniyatni boy berishdi (1:2).

«Malyorka»ning «Real» ustidan qozongan ajoyib g‘alabasi. Madridliklar juda sust ambisiya va dinamika namoyish etishdi. Buni tushunish qiyin, ammo «Malyorka» uchun bu natija La Ligada jon saqlab qolish yo‘lidagi o‘ta muhim uch ochkoni anglatadi.

Futbolda, umuman sportda bo‘lgani kabi, oxirigacha kurashish kerak. Ammo «Barselona»ning g‘alabasi va «Real»ning mag‘lubiyatini hisobga olsak, menimcha, madridliklar chempionlik bilan allaqachon xayrlashib bo‘lishdi. Agar jamoaning hozirgi darajasini «Barselona» ko‘rsatayotgan o‘yin bilan solishtirsak, vaziyatni o‘z foydasiga burib yuborish o‘ta murakkab bo‘ladi. Kim aybdor? Murabbiy doimo mas’uliyatni o‘z zimmasiga oladi, lekin menda asosiy ayb ikki futbolchida degan noxush his bor. Meni eng ko‘p hayron qoldirayotgan narsa — «Real» o‘yinida dinamikaning yo‘qligi», — deya Migel Nadalning so‘zlarini keltirmoqda AS nashri.

«Real» Ispaniya chempionati turnir jadvalida 69 ochko bilan ikkinchi o‘rinni egallab turibdi. Jamoa peshqadam «Barselona»dan yetti ochkoga ortda qolmoqda.