«Real Madrid» yarim himoyachisi Federiko Valverde o‘zi kiyib yurgan raqamning ahamiyati haqida to‘xtalib o‘tdi. Avvalroq klubda 8-raqam germaniyalik afsona Toni Kroosga tegishli edi. Valverde dastlab bu raqamni olishni istamaganini ta’kidladi.

«Rafiqam bilan bu raqamni kiyishni istamasligim haqida gaplashgandim. Bu birinchi navbatda uning avvalgi egasi Toni [Kroos]ga bo‘lgan hurmatimdan edi. Agar mening xohishimga bog‘liq bo‘lganida, klubda shunchalik ko‘p narsaga erishgan va o‘zidan o‘chmas iz qoldirgan har qanday futbolchining raqamini NBAdagi kabi muomaladan chiqargan bo‘lardim. Toni bu raqamni kiygan oxirgi inson bo‘lishi va bu raqam abadiy e’zozlanishi kerak edi.

Rafiqam esa bu raqamni kiyishim kerakligini, bunga loyiq ekanligimni aytib, meni ko‘ndira oldi. Qachonki Tonining o‘zi ham oq fotiha bergach, albatta, o‘zimni ancha xotirjam his qildim va o‘zimga bu mening vaqtim ekanligini, har kuni mashg‘ulotlarga orqamda shu raqam bilan tushayotganimdan zavqlanishim kerakligini aytdim. Har bir o‘yinga xuddi oxirgisidek yondashaman. To‘g‘ri, boshida qiyin bo‘ldi, lekin bunga arziydi», — deya Valverdening so‘zlarini keltirmoqda ESPN.