Karlo Anchelotti yaqin vaqt ichida Braziliya futbol konfederasiyasi bilan yangi shartnoma imzolaydi. Ushbu kelishuvga ko‘ra, Anchelotti Braziliya terma jamoasini 2030 yilgi jahon chempionati yakuniga qadar boshqaradi.
ESPN nashrining Braziliya filiali xabar berishicha, shartnoma uzaytirilganidan keyin Anchelottining ish haqi o‘zgarmaydi — u yiliga 10 million yevroni tashkil etadi.
Hozirda Karlo Anchelotti Braziliya terma jamoasini 2026 yilgi jahon chempionatiga eng yaxshi tarzda tayyorlash haqida qayg‘urmoqda. "Selesao" oxirgi 24 yil ichida ilk bor mundialda g‘olib chiqishga harakat qiladi.
Eslatib o‘tamiz, o‘tgan jahon chempionatida Braziliya terma jamoasi chorak finalda Xorvatiyaga penaltilar seriyasida imkoniyatni boy bergan edi.













