«Manchester Yunayted» sardori Brunu Fernandesh o‘zini hamyurti Krishtianu Ronaldu bilan solishtirishlarini noo‘rin deb hisoblaydi.
Portugaliyalik yarim himoyachi bir necha yildan beri «qizil iblislar»ning so‘zsiz yetakchisi sanaladi, biroq klubning sobiq yulduzi Ronaldu bilan o‘zaro parallellar o‘tkazilishi 31 yoshli futbolchiga ortiqchadek tuyulmoqda.
«Meni Krishtianu bilan solishtirmang — dunyodagi biror bir inson bunga loyiq emas. Ronaldu bilan qiyoslash mumkin bo‘lgan yagona inson — bu Messi. Bu ikkisining yonida hech kim tura olmaydi. Ularda alohida sport turi, o‘z o‘yinlari bor, qolgan barchamiz esa shunchaki chetdan turib ularning o‘yinidan zavq olishimiz kerak», — deya Fernandeshning so‘zlarini keltirmoqda Al Nassr Zone.
Krishtianu Ronaldu 2022 yilda «Manchester Yunayted»ni tark etgan edi. 2023 yil boshidan beri hujumchi Saudiya Arabistonining «An-Nasr» klubida to‘p surmoqda.
