Londonning "Chelsi" klubi yarim himoyachisi, argentinalik Enso Fernandes yozgi transfer oynasida jamoani tark etishi mumkin. Bu haqda Diario AS nashri xabar bermoqda.
Manba bergan ma’lumotlarga ko‘ra, agar "Chelsi" Chempionlar ligasi yo‘llanmasini qo‘lga kirita olmasa, yozda 25 yoshli Fernandesni sotuvga qo‘yishi mumkin.
Hozirgi vaqtda xavbekning harakatlarini "PSJ" va Madridning "Real" klublari diqqat bilan kuzatib borishmoqda. Joriy mavsumda Fernandes barcha turnirlarda 46 ta uchrashuvda maydonga tushib, 12 ta gol urdi va o‘z hisobiga oltita golli uzatmani yozdirib qo‘ydi.
Transfermarkt mutaxassislari Fernandesning bozor qiymatini 90 million yevroga baholamoqda.













