«Manchester Siti» bosh murabbiyi Xosep Gvardiola Angliya Premyer-ligasining 32-turi doirasida «Chelsi»ni 3:0 hisobida tor-mor etdi. Shu tariqa, ispaniyalik mutaxassis o‘z murabbiylik faoliyati davomida 18-bor «ko‘klar» ustidan g‘alaba qozondi.
Qayd etish joizki, Gvardiola faoliyati davomida faqat bitta klubni bundan ham ko‘p marotaba mag‘lub etgan. Bu Londonning «Arsenal» klubidir. Ispaniyalik mutaxassis «kanonirlar» ustidan 21 marta zafar quchgan. Eslatib o‘tamiz, «Manchester Siti» APLning 33-turi doirasida aynan «to‘pchilar» bilan 19 aprel kuni bahs olib boradi.
Hozirda «shaharliklar» 64 ochko bilan turnir jadvalida ikkinchi o‘rinda bormoqda va bitta zaxira o‘yiniga ega bo‘lgan holda «Arsenal»dan (70 ochko) olti ochkoga ortda qolmoqda. «Ko‘klar» esa 48 ochko bilan APL jadvalida oltinchi pog‘onani egallab turibdi.
