«Manchester Yunayted» sardori Brunu Fernandesh APL 32-turi doirasidagi «Lids»ga qarshi o‘yinda (1:2) himoyachi Lisandro Martinesning chetlatilishiga munosabat bildirdi. Argentinalik futbolchi «Lids» hujumchisi Dominik Kalvert-Lyuinning sochidan tortgani uchun maydondan haydalgan edi. Bundan tashqari, portugaliyalik yarim himoyachi uchrashuv bosh hakami Pol Tirnining boshqa qarorlaridan ham norozi bo‘ldi.
«Agar hakam haqida gapirishni boshlasam, katta muammolarga duch kelaman. Bu haqda gapirishni istamayman, chunki qoidalar hamma uchun har xil va ular turlicha talqin qilinadi. Ko‘rsatilgan sariq kartochkalardagi farq ham yaqqol ko‘rinib turibdi. Shunday ekan, menga shunchaki sukut saqlagan ma’qul», — deya Fernandeshning so‘zlarini keltiradi Sky Sports.
Navbatdagi turda «Manchester Yunayted» «Chelsi» bilan kuch sinashadi.













