«Манчестер Юнайтед» сардори Бруну Фернандеш АПЛ 32-тури доирасидаги «Лидс»га қарши ўйинда (1:2) ҳимоячи Лисандро Мартинеснинг четлатилишига муносабат билдирди. Аргентиналик футболчи «Лидс» ҳужумчиси Доминик Калверт-Льюиннинг сочидан тортгани учун майдондан ҳайдалган эди. Бундан ташқари, португалиялик ярим ҳимоячи учрашув бош ҳаками Пол Тирнининг бошқа қарорларидан ҳам норози бўлди.

«Агар ҳакам ҳақида гапиришни бошласам, катта муаммоларга дуч келаман. Бу ҳақда гапиришни истамайман, чунки қоидалар ҳамма учун ҳар хил ва улар турлича талқин қилинади. Кўрсатилган сариқ карточкалардаги фарқ ҳам яққол кўриниб турибди. Шундай экан, менга шунчаки сукут сақлаган маъқул», — дея Фернандешнинг сўзларини келтиради Sky Sports.

Навбатдаги турда «Манчестер Юнайтед» «Челси» билан куч синашади.