Yakshanba kuni Kilian Mbappe «Real» mashg‘ulotlarini o‘tkazib yubordi. «Jirona»ga qarshi kechgan avvalgi o‘yinda raqib bilan to‘qnashib ketganidan so‘ng, Mbappening qosh qismiga bir nechta chok qo‘yilgan edi. Jarohat jiddiy emas — fransuz allaqachon mashg‘ulotlarga qaytdi.

AS nashrining xabar berishicha, Mbappe «Bavariya»ga qarshi bahsda niqobda emas, balki himoya bog‘lamida (plastir) maydonga tushadi. Muammo u qadar katta bo‘lmagani sababli futbolchiga maxsus himoya niqobining kerakligi yo‘q.

«Bavariya» va «Real» jamoalari chorshanba, 15 aprel kuni Chempionlar ligasi 1/4 finalining javob uchrashuvini o‘tkazishadi. Myunxendagi o‘yin Toshkent vaqti bilan soat 00:00 da (16 aprelga o‘tar kechasi) boshlanadi. O‘tgan haftada o‘z maydonida kechgan dastlabki bahsda «Real» Bundesliga chempioniga 1:2 hisobida imkoniyatni boy bergan edi.