«PSJ» futbolchilari va klub prezidenti Nosir Al-Helayfi «Xillsboro» stadionida halok bo‘lganlar xotirasiga hurmat bajo keltirishdi.
Mash’um fojia 1989 yil 15 aprel kuni Angliya Kubogi yarim finali doirasidagi «Liverpul» va «Nottingem Forest» o‘rtasidagi o‘yinda yuz bergan edi. Tirbandlik va bosim natijasida mersisaydliklarning 97 nafar muxlisi halok bo‘lgan.
Chempionlar Ligasi chorak finalidan o‘rin olgan «Enfild»dagi javob o‘yini oldidan parijliklar va Al-Helayfi fojia qurbonlarini yod etish bilan birga, o‘tgan yilning iyul oyida YTH natijasida vafot etgan Diogu Jota va uning akasi Andre Teysheyra da Silva xotirasiga bag‘ishlangan memorialni ham ziyorat qilishdi.
«Liverpul» va «PSJ» o‘rtasidagi javob uchrashuvi bugun bo‘lib o‘tadi va Toshkent vaqti bilan tungi soat 00:00 da (15 aprelga o‘tar kechasi) boshlanadi. O‘yin boshlanishidan oldin «Xillsboro» qurbonlari xotirasi uchun bir daqiqalik sukut saqlanadi, futbolchilar esa maydonga motam bog‘ichlari bilan tushib kelishadi.
