«Bavariya» va Niderlandiya terma jamoasining sobiq yarim himoyachisi Aryen Robben Myunxen klubining hozirgi vaziyatini jamoa Bundesliga, Germaniya Kubogi va Chempionlar Ligasida zafar quchgan 2012/2013 yilgi mavsum bilan solishtirish mumkinmi, degan savolga javob berdi.

«Bu ikki davr o‘rtasida parallel o‘tkazish qiyin. Oradan 13 yil o‘tdi, futbol evolyusiyani boshdan kechirdi, ayniqsa jismoniy va boshqa jihatlardan. O‘shanda biz bir necha yil davomida nafaqat Germaniyada, balki Yevropada ham hukmronlik qilganmiz, Chempionlar Ligasi finallari va yarim finallariga muntazam chiqqanmiz.

Biz YECHLda bir marta g‘alaba qozonganmiz, lekin menimcha, yana kamida bir yoki ikki marta g‘olib bo‘lishimiz mumkin edi. O‘shanda juda ajoyib jamoa bo‘lganmiz, ko‘pchilik futbolchilar hozirgacha aloqani uzishmagan. Jamoada klubni ich-ichidan biladigan asosiy o‘zak bor edi — „Mia san mia“ ruhi, „Bavariya“ uchun o‘ynash hissi. Bu xuddi oiladek gap. Klubda nimadir qurmoqchi bo‘lsangiz, eng muhimi shu deb o‘ylayman. Hozirgi jamoada ham men buni ko‘ryapman», — dedi Robben.

Afsonaviy vinger «Bavariya»ning joriy mavsumdagi imkoniyatlariga ham to‘xtalib o‘tdi:

«Ko‘p yillik hukmronlik haqida gapirishga hali erta, lekin hech bo‘lmaganda shu mavsumda jamoa buni uddalayapti deb o‘ylayman. Men bir nechta do‘stlarimga ham aytdim — biz doim futbol haqida gaplashamiz — men uchun „Bavariya“ Chempionlar Ligasining asosiy favoriti. Gap ularning qanday o‘ynayotganida. Bu haqiqatda hayratlanarli.

Bir necha oy oldin stadionda „Bryugge“ga qarshi o‘yinni ko‘rganimdayoq hamma narsa aniq tashkil etilgani va ideal darajada bir-biriga mos tushganini payqagandim», — deya qo‘shimcha qildi u.