«Arsenal» bosh murabbiyi Mikel Arteta futbolchilarni ruhlantirish uchun tez-tez turlicha «hayratlanarli usullarni» o‘ylab topadi. Ko‘pchilik futbol ishqibozlari Artetaning kiyinish xonasida o‘yinchilarga lampani (lampochka) ko‘rsatgani haqidagi videoni yaxshi eslashadi — u lampa elektr tokisiz yonmasligini aytib, jamoaviy hamjihatlik qanchalik muhimligini tushuntirgan edi.
Endi Artetaning yana bir usuli oshkor bo‘ldi. The Touchline nashrining Gunner Blog’ga tayanib xabar berishicha, bir safar «Arsenal» ustozi futbolchilarga bo‘rilar galasi tasvirlangan suratni ko‘rsatgan. Arteta jamoani maydonda xuddi to‘da bo‘lib ov qilayotgan bo‘rilardek harakat qilishga va agressiv bo‘lishga chaqirgan. Murabbiy o‘z shogirdlari raqibning «to‘pig‘idan tishlab olgudek» darajada shiddatli bo‘lishini istagan.
Yakshanba kuni «Arsenal»ni «Manchester Siti»ga qarshi o‘ta qiyin bahs kutmoqda.
