«Арсенал» бош мураббийи Микель Артета футболчиларни руҳлантириш учун тез-тез турлича «ҳайратланарли усулларни» ўйлаб топади. Кўпчилик футбол ишқибозлари Артетанинг кийиниш хонасида ўйинчиларга лампани (лампочка) кўрсатгани ҳақидаги видеони яхши эслашади — у лампа электр токисиз ёнмаслигини айтиб, жамоавий ҳамжиҳатлик қанчалик муҳимлигини тушунтирган эди.

Энди Артетанинг яна бир усули ошкор бўлди. The Touchline нашрининг Gunner Blog’га таяниб хабар беришича, бир сафар «Арсенал» устози футболчиларга бўрилар галаси тасвирланган суратни кўрсатган. Артета жамоани майдонда худди тўда бўлиб ов қилаётган бўрилардек ҳаракат қилишга ва агрессив бўлишга чақирган. Мураббий ўз шогирдлари рақибнинг «тўпиғидан тишлаб олгудек» даражада шиддатли бўлишини истаган.

Якшанба куни «Арсенал»ни «Манчестер Сити»га қарши ўта қийин баҳс кутмоқда.