«ПСЖ» клуби Чемпионлар лигасида «Барселона»га қарши бўлиб ўтадиган муҳим учрашув олдидан ҳимоячи Нуну Мендешнинг соғлиғи билан боғлиқ ижобий хабар олди.

Португалиялик футболчи Франция Лига 1 мусобақаси доирасида «Страсбур»га қарши ўтказилган учрашувда сонида оғриқ ҳис қилгани сабабли майдонни тарк этишга мажбур бўлган эди.

RMC нашрининг хабар беришича, ҳимоячининг ҳолати бўйича дастлабки баҳолаш натижалари ижобий бўлиб, айни пайтда унинг жароҳати «ПСЖ» тиббий штабида жиддий хавотир уйғотмаяпти.

Мендеш «Страсбур»га қарши сафар учрашувининг 87-дақиқасида майдонни тарк этиб, тўғри кийиниш хонасига йўл олган.

Ўша вақтга келиб Париж клуби бош мураббийи Луис Энрике барча алмаштириш имкониятларидан фойдаланиб бўлган эди. Шу сабабли амалдаги Европа чемпионлари учрашувнинг қолган қисмини ўн киши бўлиб ўтказишга мажбур бўлишди.

Дастлаб ушбу ҳолат португалиялик чап қанот ҳимоячисининг навбатдаги учрашувларда иштирок этиши борасида хавотирларни кучайтирди. Айниқса, «ПСЖ»нинг Чемпионлар лигасида «Барселона»га қарши муҳим баҳсга тайёргарлик кўраётгани вазиятни янада долзарблаштирди.

Бироқ дастлабки маълумотларга кўра, Мендеш жиддий жароҳат олмаган, балки сон қисмида ноқулайлик ва оғриқ ҳис қилган.

Хабар қилинишича, «ПСЖ»да ҳимоячининг ҳолатидан жиддий хавотирга тушишмаяпти. Шунга қарамай, унинг навбатдаги учрашувга тўлиқ тайёр бўлиш-бўлмаслигини аниқлаш учун қўшимча тиббий текширувлар талаб этилиши мумкин.

Нуну Мендешнинг сафга қайтиши Луис Энрике учун муҳим аҳамиятга эга. Чунки «ПСЖ»ни олдинда «Барселона»га қарши мураккаб ва юқори савиядаги Европа тўқнашуви кутмоқда.