«Milan» klubining ingliz yarim himoyachisi Ruben Loftus-CHik jarohatidan so‘ng safga qaytdi va allaqachon maydonga tushishga ulgurdi. U bergan intervyusida yaqin kelajak borasidagi optimistik fikrlari bilan o‘rtoqlashdi.

Loftus-CHik 22 fevral kuni «Parma» darvozaboni Edoardo Korvi bilan to‘qnashib ketib, safdan chiqqan edi.

«Bunday holatlar o‘yin vaqtida sodir bo‘lib turadi. Korvi ikkalamiz to‘p uchun kurashdik, har ikkimiz ham unga ega chiqmoqchi edik. O‘yindan keyin u menga xabar yozib, uzr so‘radi. Men esa muammo yo‘qligini va bu futbolda bo‘lib turishini aytib javob qaytardim. Yomon kunlar ortda qoldi», — deya futbolchining so‘zlarini keltiradi pianetamilan.it.

Hozirda «Milan» Italiya chempionati turnir jadvalida uchinchi o‘rinni egallab turibdi.