Parijda «PSJ» o‘yinlari uchun chiptalarni qalbakilashtirish bilan shug‘ullanuvchi jinoiy guruh fosh etildi. Le Parisien nashrining xabar berishicha, firibgarlik harakatlari natijasida 2000 ga yaqin muxlis jabr ko‘rgan, umumiy zarar miqdori esa 40 ming yevroni tashkil etgan. Mart oyi boshida Parij kiberpolisiyasi (BL2C) ikki yil davomida amal qilib kelgan keng ko‘lamli aldov sxemasini aniqladi va tergovni yakunladi.

Asosiy gumonlanuvchi 22 yoshli Ainis D. ismli shaxs bo‘lib chiqdi. Yigit ijtimoiy tarmoqlar orqali «PSJ»ning ham «Park de Prens»dagi uy uchrashuvlariga, ham safar o‘yinlariga soxta chiptalar sotish tizimini yaratgan. Ikki yil ichida uning akkaunti sotuvchiga ishongan 13 mingdan ortiq obunachilarni to‘plashga ulgurgan.

Jinoiy faoliyat 28 yanvar kuni «PSJ» rahbariyati polisiyaga rasmiy ariza bilan murojaat qilganidan so‘ng to‘xtatildi. So‘roq paytida Ainis D. o‘z aybiga iqror bo‘ldi. Unga nisbatan firibgarlik, qalbaki hujjatlardan foydalanish va pul yuvish ayblovlari qo‘yilgan.