Парижда «ПСЖ» ўйинлари учун чипталарни қалбакилаштириш билан шуғулланувчи жиноий гуруҳ фош этилди. Le Parisien нашрининг хабар беришича, фирибгарлик ҳаракатлари натижасида 2000 га яқин мухлис жабр кўрган, умумий зарар миқдори эса 40 минг еврони ташкил этган. Март ойи бошида Париж киберполицияси (BL2C) икки йил давомида амал қилиб келган кенг кўламли алдов схемасини аниқлади ва терговни якунлади.
Асосий гумонланувчи 22 ёшли Аинис Д. исмли шахс бўлиб чиқди. Йигит ижтимоий тармоқлар орқали «ПСЖ»нинг ҳам «Парк де Пренс»даги уй учрашувларига, ҳам сафар ўйинларига сохта чипталар сотиш тизимини яратган. Икки йил ичида унинг аккаунти сотувчига ишонган 13 мингдан ортиқ обуначиларни тўплашга улгурган.
Жиноий фаолият 28 январь куни «ПСЖ» раҳбарияти полицияга расмий ариза билан мурожаат қилганидан сўнг тўхтатилди. Сўроқ пайтида Аинис Д. ўз айбига иқрор бўлди. Унга нисбатан фирибгарлик, қалбаки ҳужжатлардан фойдаланиш ва пул ювиш айбловлари қўйилган.
