Italiyalik hujumchi, sobiq Yevropa chempioni Lorenso Insinye o‘zi uchun qadrdon bo‘lgan yangi jamoa topdi — u «Peskara» klubiga qo‘shildi. Adriatika sohili jamoasi Insinye yordamida Italiya ikkinchi divizioni (B Seriya)dagi o‘rnini saqlab qolishdan umidvor.
Agar jamoa o‘z maqsadiga erishsa, Lorenso keyingi mavsumda ham shu yerda qolishga tayyor — futbolchi va klub rahbariyati o‘rtasida shunday kelishuv mavjud.
«Men prezidentga so‘z berdim — agar B Seriyada qolsak, men ham qolaman. "Peskara" — mening ikkinchi uyim. Bu klub bilan alohida munosabatlarim bor. Oilamga ham bu yer juda yoqadi», — deya Insinyening so‘zlarini keltirmoqda derby.it.
Eslatib o‘tamiz, Insinye yaqin vaqtgacha Kanada chempionatida to‘p surayotgan edi.
