Италиялик ҳужумчи, собиқ Европа чемпиони Лоренцо Инсинье ўзи учун қадрдон бўлган янги жамоа топди — у «Пескара» клубига қўшилди. Адриатика соҳили жамоаси Инсинье ёрдамида Италия иккинчи дивизиони (Б Серия)даги ўрнини сақлаб қолишдан умидвор.
Агар жамоа ўз мақсадига эришса, Лоренцо кейинги мавсумда ҳам шу ерда қолишга тайёр — футболчи ва клуб раҳбарияти ўртасида шундай келишув мавжуд.
«Мен президентга сўз бердим — агар Б Серияда қолсак, мен ҳам қоламан. "Пескара" — менинг иккинчи уйим. Бу клуб билан алоҳида муносабатларим бор. Оиламга ҳам бу ер жуда ёқади», — дея Инсиньенинг сўзларини келтирмоқда derby.it.
Эслатиб ўтамиз, Инсинье яқин вақтгача Канада чемпионатида тўп сураётган эди.
