Agent Mario Juffredi «Inter» hujumchisi Franchesko Espozitoga ingliz jamoalari tomonidan bo‘layotgan qiziqishlar haqida fikr bildirdi.

«Pio «Inter»da baxtli. Menimcha, futbolchi ham, jamoa ham keyingi o‘n yil davomida birga bo‘lishni istaydi. Agar klubning o‘zi xohlamasa, Pio Espozito uchun transfer bozori haqida o‘ylash na mening va na futbolchining rejalarida bor. Biz uchun Pioning transfer bozori boshlanmagan va hech qachon boshlanmaydi, chunki u sotilmaydi. U «neradzurrilar» safida qolishdan mamnun. O‘ylaymanki, bu mavsumda biz unga bo‘lgan barcha kutilmalarni oshig‘i bilan bajardik», — deya Juffredining so‘zlaridan iqtibos keltiradi Football Italia.

Espozito 20 yoshda. Italiyalik forvard 2025/26 yilgi mavsumda 43 ta o‘yinda maydonga tushib, 9 ta gol urdi va 4 ta golli uzatmani amalga oshirdi. Uning «Inter» bilan shartnomasi 2030 yilning 30 iyuniga qadar amal qiladi.

Transfermarkt portali futbolchining transfer qiymatini 45 million yevroga baholamoqda.