«Manchester Yunayted» sobiq yarim himoyachisi Pol Skoulz «qizil iblislar» tarkibini kuchaytirish borasida o‘z fikrlari bilan o‘rtoqlashdi. Uning fikricha, Manchester klubiga «Arsenal» a’zosi Deklan Rays kabi futbolchi zarur.
«Men Deklan Raysga e’tibor qaratgan bo‘lardim. To‘g‘ri, ilgari uni biroz tanqid qilganman, ammo «Yunayted»ga aynan Rays kabi haqiqiy markaziy yarim himoyachi kerak deb hisoblayman», — dedi Skoulz The Good, The Bad and The Football podkastida.
Eslatib o‘tamiz, Deklan Rays 2023 yilda «Vest Xem»dan «Arsenal»ga 116 million yevro evaziga o‘tgan edi. Joriy mavsumda 27 yoshli yarim himoyachi londonliklar safida barcha turnirlarda 48 ta o‘yinda maydonga tushib, 5 ta gol va 11 ta golli uzatmaga mualliflik qildi. Uning «kanonirlar» bilan shartnomasi 2028 yilgacha mo‘ljallangan.
