«Манчестер Юнайтед» собиқ ярим ҳимоячиси Пол Скоулз «қизил иблислар» таркибини кучайтириш борасида ўз фикрлари билан ўртоқлашди. Унинг фикрича, Манчестер клубига «Арсенал» аъзоси Деклан Райс каби футболчи зарур.
«Мен Деклан Райсга эътибор қаратган бўлардим. Тўғри, илгари уни бироз танқид қилганман, аммо «Юнайтед»га айнан Райс каби ҳақиқий марказий ярим ҳимоячи керак деб ҳисоблайман», — деди Скоулз The Good, The Bad and The Football подкастида.
Эслатиб ўтамиз, Деклан Райс 2023 йилда «Вест Хэм»дан «Арсенал»га 116 миллион евро эвазига ўтган эди. Жорий мавсумда 27 ёшли ярим ҳимоячи лондонликлар сафида барча турнирларда 48 та ўйинда майдонга тушиб, 5 та гол ва 11 та голли узатмага муаллифлик қилди. Унинг «канонирлар» билан шартномаси 2028 йилгача мўлжалланган.
