«Manchester Siti» bosh murabbiyi Xosep Gvardiola Angliya Premyer-ligasidagi chempionlik uchun kechayotgan keskin kurash borasida o‘z fikrlarini bildirdi.

«Shaharliklar»ning bevosita raqobatchi — «Arsenal» ustidan qozongan g‘alabasi (2:1) turnir jadvalidagi vaziyatni yanada tig‘izlashtirdi. Agar «Manchester Siti» bugun safarda «Byornli»ni mag‘lub etsa, ochkolar bo‘yicha londonliklarga yetib oladi.

O‘yindan oldingi matbuot anjumanida Gvardiola gollar o‘rtasidagi farq chempionlik taqdiriga ta’sir qilishi mumkinligini ta’kidladi:

«Hozirgi vaziyatda to‘plar nisbati muhimmi? Albatta. Bu hamma narsani hal qilishi mumkin. Lekin biz faqat ko‘proq gol urish haqida o‘ylamasligimiz kerak. Bu yerda muvozanat muhim — agar balansni yo‘qotsak, o‘z darvozamizdan ko‘p gol o‘tkazib yuboramiz», — dedi mutaxassis.

Eslatib o‘tamiz, «Byornli» va «Manchester Siti» jamoalari o‘rtasidagi uchrashuv bugun, 22 aprel kuni Toshkent vaqti bilan soat 00:00 da (23 aprelga o‘tar kechasi) boshlanadi.

Avvalroq «Siti» yarim himoyachisi Niko Gonsales ham jamoadoshlarining kuchiga ishonishi va o‘z klubini APLning asosiy favoriti deb bilishini ma’lum qilgan edi.