«Манчестер Сити» ярим ҳимоячиси Нико Гонсалес Англия Премьер-лигасининг жорий мавсумидаги чемпионлик пойгаси борасида ўз фикрлари билан ўртоқлашди. Бу ҳақда City Report нашри хабар бермоқда.

Гонсалеснинг сўзларига кўра, у жамоадошларининг кучига тўлиқ ишонади ва «шаҳарликлар»ни мусобақанинг асосий даъвогари деб билади.

«Мен учун биз — фаворитмиз. Чунки шерикларимга ва бутун жамоага ишонаман. Ҳар доим бизни энг кучли жамоа деб ҳисоблаганман. Менимча, «Арсенал» ҳам ўзини фаворит деб ҳисобламоқда», — деди футболчи.

Эслатиб ўтамиз, аввалроқ «Манчестер Сити» ўз майдонида «Арсенал»ни 2:1 ҳисобида мағлуб этиб, турнир жадвалидаги фарқни қисқартиришга муваффақ бўлган эди. Айни пайтда Хосеп Гвардиола шогирдлари 67 очко билан иккинчи ўринда бормоқда. Микель Артета бошқарувидаги «канонирлар» ҳисобида эса 70 очко мавжуд, бироқ Лондон клуби «Сити»га қараганда битта кўп ўйин ўтказган.

Маълумот учун, бугун, 22 апрель куни «Манчестер Сити» сафарда «Бёрнли» меҳмони бўлади. Учрашув Тошкент вақти билан соат 00:00 да (23 апрелга ўтар кечаси) бошланиши белгиланган.