«Манчестер Сити» бош мураббийи Хосеп Гвардиола Англия Премьер-лигасидаги чемпионлик учун кечаётган кескин кураш борасида ўз фикрларини билдирди.

«Шаҳарликлар»нинг бевосита рақобатчи — «Арсенал» устидан қозонган ғалабаси (2:1) турнир жадвалидаги вазиятни янада тиғизлаштирди. Агар «Манчестер Сити» бугун сафарда «Бёрнли»ни мағлуб этса, очколар бўйича лондонликларга етиб олади.

Ўйиндан олдинги матбуот анжуманида Гвардиола голлар ўртасидаги фарқ чемпионлик тақдирига таъсир қилиши мумкинлигини таъкидлади:

«Ҳозирги вазиятда тўплар нисбати муҳимми? Албатта. Бу ҳамма нарсани ҳал қилиши мумкин. Лекин биз фақат кўпроқ гол уриш ҳақида ўйламаслигимиз керак. Бу ерда мувозанат муҳим — агар балансни йўқотсак, ўз дарвозамиздан кўп гол ўтказиб юборамиз», — деди мутахассис.

Эслатиб ўтамиз, «Бёрнли» ва «Манчестер Сити» жамоалари ўртасидаги учрашув бугун, 22 апрель куни Тошкент вақти билан соат 00:00 да (23 апрелга ўтар кечаси) бошланади.

Аввалроқ «Сити» ярим ҳимоячиси Нико Гонсалес ҳам жамоадошларининг кучига ишониши ва ўз клубини АПЛнинг асосий фаворити деб билишини маълум қилган эди.