Мадриднинг “Реал” клуби “Манчестер Сити” ҳужумчиси Эрлинг Ҳоландни шу ёздаёқ трансфер қилиш имкониятини жиддий кўриб чиқмоқда.
Қайд этилишича, Жозе Моуриньо норвегиялик ҳужумчининг трансферидан манфаатдор. Бироқ бундай йирик трансферни амалга ошириш учун Мадрид клуби жамоа етакчиларидан бирини сотишига тўғри келиши мумкин.
Бу футболчи Жуд Беллингем бўлиши эҳтимоли мавжуд. Моуриньо англиялик футболчининг сотилишини икки сабабга кўра зарур деб ҳисобламоқда: бу таркибдаги тактик мувозанатни сақлашга ёрдам беради ва “Реал”га Ҳоланд трансфери учун маблағ ишлаб олиш имкон яратади.
Шу билан бирга, Килиан Мбаппе ва Винисиус Жуниор жамоада дахлсиз мақомга эга. Уларни норвегиялик ҳужумчини трансфер қилиш учун сотиш варианти Мадрид клубида кўриб чиқилмаяпти.
Ҳоланднинг ўзи ҳам “Манчестер Сити”ни тарк этиш эҳтимолини истисно қилмаяпти ва фаолиятини бошқа клубда давом эттиришга тайёр.
Бироқ вазиятни “Барселона”нинг ҳам норвегиялик ҳужумчига қизиқаётгани мураккаблаштирмоқда. Агар Испаниянинг икки гранд клуби Ҳоланд учун жиддий курашга киришса, унинг трансфери футболдаги энг катта воқеалардан бирига айланиши мумкин.
Маълумот учун, Беллингем “Реал” билан Чемпионлар Лигаси ва Испания чемпионатида ғолиб чиққан. Кейинчалик у жамоа сафида Испания Суперкубоги ҳамда FIFA қитъалараро Кубогини ҳам қўлга киритган. Бунгача эса англиялик футболчи Дортмунднинг “Боруссия” клуби билан Германия Кубогида зафар қучган.
Беллингем Англия терма жамоаси билан Европа чемпионатида икки бор кумуш медал соҳиби бўлган — Евро-2020 ва Евро-2024 турнирларида. У 2026 йилги Жаҳон чемпионатида Англия таркибида бронза медални қўлга киритган.
Англиялик футболчининг шахсий совринлари ҳам талайгина. У 2023 йилда Golden Бой ва Копа Trophy мукофотларини қўлга киритган, кейинчалик Ла Лигада мавсумнинг энг яхши футболчиси деб топилган. Бундан ташқари, Беллингем Англия терма жамоаси тарихида 50 та ўйинда майдонга тушган энг ёш футболчига айланган.
