Milanning «Inter» klubi qanot himoyachisi Denzel Dyumfris kelayotgan yozgi transfer oynasida jamoasini o‘zgartirishi mumkin. Bu haqda L’Interista nashri xabar bermoqda.

Manbaga ko‘ra, 30 yoshli niderlandiyalik futbolchiga Angliya Premyer-ligasining bir nechta klublari qiziqish bildirmoqda. «Inter» rahbariyati Dyumfrisga yillik toza maoshi 5 million yevro bo‘lgan yangi shartnoma taklif qilgan, biroq futbolchi hozircha bunga javob qaytarmagan.

Milanliklar mutasaddilarini vaziyatning qaltisligi xavotirga solmoqda. Gap shundaki, futbolchining amaldagi shartnomasida tovon puli miqdori bor-yo‘g‘i 25 million yevro etib belgilangan. Qayd etilishicha, «Manchester Yunayted» va «Aston Villa» klublari allaqachon ushbu mablag‘ni to‘lab, futbolchini sotib olishga tayyor ekanliklarini bildirishgan.

Ma’lumot uchun, Denzel Dyumfris joriy mavsumda barcha musobaqalarda 24 ta o‘yinda maydonga tushib, 5 ta gol va bitta golli uzatmani o‘z hisobiga yozdirib qo‘ydi.