Миланнинг «Интер» клуби қанот ҳимоячиси Дензел Дюмфрис келаётган ёзги трансфер ойнасида жамоасини ўзгартириши мумкин. Бу ҳақда L’Interista нашри хабар бермоқда.

Манбага кўра, 30 ёшли нидерландиялик футболчига Англия Премьер-лигасининг бир нечта клублари қизиқиш билдирмоқда. «Интер» раҳбарияти Дюмфрисга йиллик тоза маоши 5 миллион евро бўлган янги шартнома таклиф қилган, бироқ футболчи ҳозирча бунга жавоб қайтармаган.

Миланликлар мутасаддиларини вазиятнинг қалтислиги хавотирга солмоқда. Гап шундаки, футболчининг амалдаги шартномасида товон пули миқдори бор-йўғи 25 миллион евро этиб белгиланган. Қайд этилишича, «Манчестер Юнайтед» ва «Астон Вилла» клублари аллақачон ушбу маблағни тўлаб, футболчини сотиб олишга тайёр эканликларини билдиришган.

Маълумот учун, Дензел Дюмфрис жорий мавсумда барча мусобақаларда 24 та ўйинда майдонга тушиб, 5 та гол ва битта голли узатмани ўз ҳисобига ёздириб қўйди.